ਪੱਥਰ ਹੈ ਅੱਜ ਵੀ ਅਹਿੱਲਿਆ ਕੋਈ,
ਕਿਸੇ ਗੌਤਮ ਦੀ ਸਰਾਪੀ,
ਸ਼ਾਇਦ ਹੀ ਆਏ ਹੁਣ ਰਾਮ ਕੋਈ ,
ਉਸ ਦੇ ਉਧਾਰ ਲਈ ।

ਖੁਸ਼ ਹੈ ਫਕੀਰ ਵੇਖੋ,
ਉਸ ਰੱਬ ਦੀ ਮੌਜ ਵਿੱਚ ।
ਮਰ ਰਿਹਾ ਹੈ ਸ਼ਾਹੂਕਾਰ ਕਿੰਞ,
ਪੈਸੇ ਦੇ ਪਿਆਰ ਲਈ ।

ਚੱਲ ਪਏ ਹਾਂ ਦੋਸਤੋ,
ਮੰਜ਼ਿਲ ਵੱਲ ਰੁੱਖ ਕਰ ਕੇ ।
ਮਨ ਵਿੱਚ ਨਹੀਂ ਸਵਾਲ ਕੋਈ,
ਜਿੱਤ ਜਾਂ ਹਾਰ ਲਈ ।

ਉਸ ਦਿਨ ਤੋਂ ਰੱਬ ਦੇ,
ਹੋਰ ਵੀ ਨੇੜੇ ਹੋ ਗਿਆਂ ।
ਚੱਲਿਆ ਹਾਂ ਜਿਸ ਦਿਨ ਤੋਂ ,
ਮਨ ਦੇ ਸ਼ਿਕਾਰ ਲਈ ।

ਮੇਟ ਕੇ ਦਿਲੋਂ ਨਫਰਤਾਂ,
ਚਲੋ ਸਿੱਖੀਏ ਮੁਹੱਬਤਾਂ ।
ਕੁਝ ਤੇ ਚੰਗਾ ਛੱਡ ਜਾਈਏ ,
ਯਾਰੋ ਇਸ ਸੰਸਾਰ ਲਈ ।

ਕੀਤੀਆਂ ਜਿੰਨਾਂ ਨੇ ਮਿਹਨਤਾਂ,
ਪਾਈਆਂ ਉਹਨਾਂ ਹੀ ਮੰਜ਼ਿਲਾਂ ।
"ਸੁਰਿੰਦਰ" ਮਿਹਨਤਕਸ਼ ਲੋਕਾਂ,
ਕਿੰਞ ਬਾਜ਼ੀ ਮਾਰ ਲਈ ।